Бесланысе трагедийлан- 16 ий
Бесланысе трагедийлан- 16 ий. 2004-ше ий, 3-шо сентябрьыште Йӱдвел Осетийысе Бесланыште шучко азап лийын. Школым штурмоватлыме годым 333 еҥ ӱмыр лугыч лийын, нунын кокла гыч шукыжо- йоча- влак. 800 утла еҥ тӱрлӧ семын сусырген да эмганен. Тиде теракт Российын историйыштыже ик эн кугу лийын. 9 шагат эрдене линейкыш тӱжем утла еҥ погынен. Пайрем эртыме жапыште школ кудывечыш сар-куралым кучен, 30 утла бандит пурен. Лӱйкален, нуно йоча да кугыеҥ- влакым школыш поктен пуртеныт да кум кече вӱд да кочкыш деч посна автомат дене лӱдыктен кученыт. Кумшо сентябрьыште спортзалыште пудешталтмаш шоктен. Тунам силовик- влак заложник-шамычым утараш тӱҥалыныт. Чылам тояш верысе шӱгарлаште вер ситен огыл, уым почыныт. Тудым «Суксо- влакын олашт» манын лӱмденыт.
