Александр Бакулевскийын лӱмгече ончерже
Калыкле сӱрет галерейыште кугарнян 16 шагатлан сӱретче Александр Бакулевскийын шочмыжлан 85 ий темме лӱмеш лӱмгече выставкыже почылтеш. Тудо ик эн лӱмлӧ ксилографий мастарлан шотлалтеш. Тиде пашалан тудо 40 ий утла илышыжым пӧлеклен. Александр Бакулевский 70 утла книгалан сӱретым ыштен. «Йоча литература», «Совет Россий», «Шонанпыл», Марий, Удмурт, Тора Эрвел книга савыктыш- влак дене пашам ыштен, Пушкинын чыла повестьшым сылнештарен. Тудын пашаже- влакым Россий деч посна Италий, Австрий, Германий, Франций, Чехийыште ончыктымо. Гравюрыжо- влак Третьяков галерейыште, Москосо Пушкин тоштерыште, Угарман, Саратов, Киев да моло олаласе художественный тоштерлаште аралалтыт. 50 гравюрыжо Австрийысе Альбертина тӱнямбал графика тоштерыште аралалтеш.
