Александр Евстифеев: Куженер районын куатше уло…

Кодшо кугарнян Республикым вуйлатыше паша дене Куженер районыш миен да икмыняр объектым ончен. Ик эн ончыч тудо Коҥганур кыдалаш школыш миен. Тиде школышто калык йӱлам арален, пеҥгыдемден толыт, кычалме да краеведений пашам чолган виктарат. Школыштак йоча сад пашам ышта. 2017-ше ийыште школым капитально олмыктымо, 2018-ше ийыште котельныйым газыш кусарыме. Кодшо ий мучашыште школым кугу скоростян увер системе да интернет деке ушымо. Александр Евстифеев котельныйым, школ класс- влакым, йоча садым, спорт залым ончен лектын, персонал дене мутланен. Тиддеч вара тудо Куженер посёлкысо рӱдӧ паркыш миен. Кодшо ийын тудым пужен ышташ тӱҥалме. Тиде пашалан ныл миллион наре теҥге оксам кучылтмо. Тений тиде пашам мучашлышаш улыт. Куженер район администрацийым вуйлатыше Сергей Михеев Кугу сарын геройжо- влаклан мемориалым тӱзатыме да Кугу сеҥымашлан палемдыме мероприятий- влак нерген каласкален. Тиде кечынак республикым вуйлатыше Куженер районлан 85 ий темме лӱмеш эртарыме пайрем мероприятийыш миен да погынышо калыкым пайрем дене саламлен. Сар жапыште район гыч шым тӱжемат 390 еҥ фронтыш каен. Тушечын ныл тӱжемат 580 еҥже мӧҥгеш пӧртылын огыл. Район шӧрым лӱштымӧ дене республике мучко вич ончыл кундем радамыш пура. Пайдаланыдыме озанлык мландым уэш оборотыш чолган пурта. Калыкле проект-влакат шыҥдаралтыт, кок ФАП-ым чоҥаш лийме, яллашке газ пурталтеш. Паша лектыш районын куатше улмым, верысе калыкын пашам йӧратымыжым да шочмо кундемым аклымыжым  ончыкта,- каласен Александр Евстифеев.

Прошлые выпуски