Благовещений башньыште Куженер район дене палыме лияш лиеш

Благовещений башньыште Куженер район дене палыме лияш лиеш
Йошкар-Оласе Благовещений башньыште «Марий Элын поликультурный картыже» проект кышкарыште эше ик ончер почылтын. Тиде гана шке выставкыжым Куженер район ямдылен. Тудо шушаш январьыште шкенжын 85 ияш лӱмгечыжым палемда. Экспозицийым почмашке тӱвыра министр Константин Иванов миен. Тудо палемден: Евсеев лӱмеш калыкле тоштерын тӱҥалме проектше пеш оҥай. Кажне гана ме ужына: ик республике кӧргысо район- влак моткоч ойыртемалтше улыт. Кажныжын шкенжын историйже, тӱвыра поянлыкше, оҥайже уло. Куженер кундемым таклан огыл Марий Швейцарий маныт. Но тудын эн тӱҥ поянлыкше- пашам йӧратыше, талантан калыкше. Погынышо- влакым районым вуйлатыше Ольга Фокинат саламлен да районын илышыже дене палдарен. Куженер кундем 38 поэт, писатель, журналист, 12 сӱретче, 19 артист, композитор да музыкантын, 38 шанче да 80 мер-политик пашаеҥын шочмо верже. Тушто 61 кӱсото верланен. Чалай, Мокеев, Горинов лудмаш- влак эртат. Вара выставкым почмаште уна- влаклан ойыртемалтше тошто марий муро- влак йоҥгеныт.

Прошлые выпуски