Александр Евстифеев тений шуктымо пашам иктешлен

Александр Евстифеев тений шуктымо пашам иктешлен
Марий Элым вуйлатыше Александр Евстифеев Правительствын тений шуктымо пашажлан отчётым ыштен. Правительствын кумдаҥдыме заседанийже Конгресс- влак полатыште эртен. Погынымаште правительствын еҥже- влак, Кугыжаныш Погынын депутатше-шамыч, кугыжаныш кучем органлам вуйлатыше, ола да район вуйлатыше, республикысе да районласе СМИ-н тӱҥ редакторышт, мер организацийлан еҥышт лийыныт. Республикым вуйлатыше эн ончыч тений правительствын очнылно шогышо приоритет задаче- влак нерген ойлен. Тиде- калыкле проект- влакым шыҥдарымаш. Нунын кышкарыште регионысо 53 проектым пеҥгыдемдыме. 2024-ше ий марте тиде пашалан 52 миллиард теҥге ойыралтшаш. Проектлам шыҥдарыме икымше ийыштак республике сай лектышым ончыктен, - каласен Александр Евстифеев. Вара тений лийше тӱҥ событий- влакым ушештарен. Тӱҥ верыште кугыжаныш парымым иземдымаш лийын. Тудо ик миллиардат 200 миллион утла теҥгелан шагалеммын да 11 миллиардат 990 миллион теҥге кодын. Правительствын резерв фондшым шукырак чумырымо. 1-ше октябрь гыч бюджет сферыште тыршыше- влакын пашадарыштым 4 утла процентлан кугемдыме. Ончыко сайын кайымаш промышленностьышто, туризмыште, чоҥымаште да ял озанлыкыште палдырна. Ял озанлык сатум ыштен налме индекс 110 процентым эртен. Тиде показатель дене Марий Элна округышто кокымшо, Российыште 10-шо верым айла. Корным олмыктымо да ыштыме пашат воранен толеш. Тений йоча садлаште тӱжемат 165 ешартыш верым ыштыме. Кодшо ийын 598 гына лийын. школ- влак чоҥалтыт, ФАП-ым пашаш колтымо, куснылшо 11 медицина комплексым, 23 вашкеполыш машинам, медоборудованийым налме. Медицина тӧнеж-влак пужен ышталтыт але уэш чоҥалтыт. Евстифеев докладыштыже моло йодыш- влакымат тарватен. Чылан пырля ваш умылен пашам ыштымлан таум каласен.
                     Церемоний мучашыште сеҥымашыш шушо еҥ- влаклан наградым кучыктымо. «Марий Эл ончылно надырлан» орденын медальжым Татар тӱвыра рӱдерын художественный вуйлатышыже Гарай Магсумьяновлан, Перинатал рӱдерын тӱҥ варчшын алмаштышыже Галина Фоминыхлан, Квалификацийым вияҥдыме методик рӱдерын директоржо Ирина Чистовалан пуымо. «Марий Элын сулло юристше» лӱмым республикысе Конституций суд вуйлатышын алмаштышыже Валериан Егоров налын. Правительствын Чап Грамотыжым суд пристав службо виктемым вуйлатышын алмаштышыже Николай Кудряшовлан пуымо. Республикым вуйлатышын тауштымашыжым «Нардный фронт «За Россию» мер толкынын исполкомжым вуйлатыше Надежда Ефремова ден Килемар район администрацийым вуйлатыше Людмила Толмачевалан увертарыме.

Прошлые выпуски