«Марий Эл» ансамбльлан- 80 ий темын

«Марий Эл» ансамбльлан- 80 ий темын
Эрик Сапаев лӱмеш опера да балет театрыште «Марий Эл» Кугыжаныш куштышо ансамбльын 80 ияш лӱмгечыжлан пӧлеклалтше пайрем концерт лийын. Тиде кугу лӱмгече дене усталык коллективым регионым вуйлатыше Александр Евстифеев саламлен. Ансамбльын сеҥымаш деке кужу корныжо республикын историйже денат чак кылдалтын. Коллектив неле сар жапымат эртен, фронтышто салтак- влакын, тылыште пашазе- влакын кумылыштым нӧлтен, вара гастроль пашажым вияҥден толын. Тиде жапыште ансамбль республикын визит карточкыжо лийын. Марий Элым вуйлатышын мутшо почеш, тӱвыралан полшымаш- правительствын пашаштыже ик эн кӱлешан йодыш. Тудо артист- влакым профессионал мастарлыкыштлан, кундемысе тӱвырам вияҥдымашке пыштыме надырыштлан тауштен да наградым кучыктен. «Марий Эл» ансамбльын солистке-вокалисткыже Зоя Берниковалан Россий Федерацийын сулло артистше Чап лӱмым пуымо. Республикым вуйлатышын тауштымашыжым «Марий кундем» оркестр гыч Алёна Потаповалан, филармоний гыч Сергей Яндимировлан, Марий Эл» ансамбль гыч Лилия Самойлова ден Алексей Поликановлан увертарыме. Правительствын Чап грамотыжым оркестрым вуйлатыше Сергей Пчёлкин, куштышо Андрей Николаев, «Марий кундем» оркестр гыч Денис Мишуров налыныт. А ансамбльым вуйлатыше Славик Асмаевлан автобусым налаш сертификатым кучыктымо.

Прошлые выпуски