Калыкле проект почеш тений корным олмыктымо пашам 13 процентлан темыме
«Лӱдыкшыдымӧ да сай качестван автомобиль корно- влак» калыкле проект почеш Марий Элыште тений корным олмыктымо планым 13 процентлан темыме. Тидын нерген Александр Евстифеевын Российын транспорт министрже Евгений Дитрих дене вашлиймыж годым каласыме. Республикым вуйлатышын увертарымыж почеш, 173 меҥге корным олмыктымо. Тидыже палемдыме деч 20 меҥгылан шукырак. 2020-шо ийлан объект- влак шотышто торгым мучашлыме. Кундемыштына чылаже кум тӱжем утла меҥге регионысо корно шотлалтеш. Калыкле проект почеш республикыштына 500 меҥге наре корным норматив марте шуктыман. Тений корно пашалан ик миллиардат 600 миллион тенгем ойырымо ыле. Ме лабораторийын оборудованийжымат уэмден кертна. Сандене качествым, у стандартым шуктымым чот эскерена, - каласен Александр Евстифеев. Калыкле проект 2024-ше ий марте шыҥдаралтеш. Тудо ДТП лийме верым, тушто колымашым шагалемдаш, норматив дене келшен толшо регионысо корным 50 процент марте шукташ полшышаш.
