Черланыше- влак ешаралтынак шогат
Тачысе кечылан шотлымаште республикыштына коронавирус дене эше 29 еҥ черланен да тӱшка чотшо 291 еҥыш шуын. Тымарте 46 еҥ черым сеҥен, эмлалт лектын. Россий мучко черланышын чотшо 47 тӱжемат 121 еҥыш шуын. Эртыше суткаште гына 4 тӱжемат 268 еҥын чержым пеҥгыдемдыме. Кум тӱжемат 446 еҥ тӧрланен лектын. Но 405 еҥ ӱмыр лугыч лийын. Черланыше- влакын чотышт дене мемнан республике 16-шо верым айла. Республикысе йоча эмлыме верыште 5 еҥ, Звениговышто 14, Медведевыште 10, Волжскышто 5, Марий Турекыште 17, Козьмодемьянскысе эмлыме верыште 10 еҥ эмлалтыт. Инфекционный стационарлаште 213 еҥ эмлалтеш. Кок еҥ шӱлаш полшышо аппарат дене пайдалана, 26 еҥ начар тазалыкан, кокла нелытанлан 120 еҥ шотлалтеш, 73 еҥлан кислородым пуат.
