«Чодырам арален кодена» акцийыш ушныза
Чодыра озанлык федерал агентстве «Иле, чодыра!» акций кышкарыште пушеҥгым шындыме шотышто «Чодырам арален кодена» Россий кӱкшытан кугу акцийым увертарен. Тудын дене келшышын, пушеҥгым шындаш, чодырам шӱк-куштыра деч эрыкташ, илыме кундемлаште пушеҥге ден кушкылым шындаш да ончен- кушташ, отым, аллейым, скверым ышташ, кундемлам тӱзландараш, калыклан умылтарыме пашам эртараш палемдыме. Чыла тидыже чодырам переген кучылташ, тудым шукемдаш туныктышаш. Мемнан республикыште чодырам шындыме акций 21-ше сентябрь гыч 31-ше октябрь марте шуйна. Тӱн акцийже Куяр лесничестве кундемын 26-шо кварталыштыже 28-ше сентябрьыште лийшаш. Тушко ушнаш йодмашым ончылгоч пӱртӱс поянлык министерствыш 42-16-58 номеран телефон дене йыгыртен пуыман.
