Ир сӧсна шыл дене шашлык, кыне нӧшмӧ дене шӱр, нужгол дене подкогыль, висте пучымыш… Кушто сийленыт?
Марий Элын делегацийже Коми кундемысе Сыктывкар ола воктене «Шаньга фест-2019» кокымшо Тӱнямбал гастрономий фестивальыште мастарлыкшым ончыктен. Калык сийым Финляндий, Карелий, Удмуртий, Коми республикыла да Мурманск ола гыч уста повар- влак ямдыленыт. «Тёплая речка» тарктирын кӱэштме марий кочкышым чыланат куанен авызленыт. Ир сӧсна шыл дене шашлык, кыне нӧшмӧ дене шӱр, ир кайык да лудо шыл, пареҥге-торык да нужгол дене подкогыль, кум тӱрлӧ марий мелна, кыне ложаш дене ыштыме кинде иктымат ӧрдыжеш коден огытыл. Висте пучымышлан эсогыл черет чумырген. Кочкыш деч посна фестивальыште оҥай сувенир, турист маршрут- влакым ончыктымо. Чылажымат шке сылне муро- куштымашыже дене «Морко кундем» ансамбль сӧрастарен.
