Нарколабораторийым ыштен пояш шонен, но судыш кая

Нарколабораторийым ыштен пояш шонен, но судыш кая
МВД-н Следствий виктемжын следствий частьше Йошкар-Олаште илыше 26 ияш пӧръеҥын наркотикым закондымын шаркалыме шотышто осал пашам ыштымыжлан титаклыме уголовный пашам ончен пытарен. Рашемдыме: 2018-ше ий декабрь гыч тений март марте тудо айлыме гаражыште лабораторийым ыштен да наркотик средствым ямдылен. Тидлан гаражыште вентиляцым келыштарен, химоборудованийым, лабораторий атышӧрым, электрон весам, ингредиентым налын. Но наркотикшым ужален шуктен огыл. Уголовный розыскын еҥже- влак тудым Памар села воктене кученыт. Тудо автомобильыште Йошкар-Ола гыч пассажир семын Татарстаныш кая улмаш. Пеленже 900 грамм наркотикше лийын. Тудым пошкудо кундемыште шаркалаш шонен. Вара тергымеке, гаражыштыже эше 30 грамм веществам верештме. Уголовный пашам тарватыме. Тудым ончаш судыш колтымо.

Прошлые выпуски