Пасу пашаеҥ- влак уло куатын тыршат
Марий Элым вуйлатыше Александр Евстифеевын правительствын заседанийжым эртарыме годым ял озанлык паша нергенат мутланыме. Кызыт республикыште пасу паша рӱж кая. Пырчан, пырчан да отызан культурым 80 тӱжем утла гектар гыч поген налме. Тидыже палемдымын 70 процентше лиеш. Тидын нерген ял озанлык министр Александр Гречихо ойлен. Пасу пашаеҥ- влак 198 тӱжем тонн утла пырчым шийын налыныт. Кокла лектыш ик гектарлан шотлымаште 23 центнерыш погына. Ӱмаште 21 центнер ыле. Пасулаште кызыт 286 комбайн тырша. Ик кечыште ныл тӱжем наре гектар гыч шийын налыт. Тыгеже ик комбайнлан 484 гектар логалеш. Тений игече пеш кугу чаракым ыштен. Пашамат кучен, пырчыланат сайын шуаш йӧным пуэн огыл. Россельхозцентрын специалистше- влак шке жапыштыже ял озанлык пашаеҥ- влаклан кӱлеш темлымашым колтеныт. Мутлан, чот вӱдыжгӧ годым кузе пырчым кошташ да аралаш кӱлеш. Тымарте кокияш культурым ныл тӱжемат 400 тонным аралаш пыштыме. Тиде планын 55 процентше лиеш. Икияшым кум тӱжемат 400 тонным шапашлыме. Тидыже планын 15 процентше гына лиеш. Тидын годымак пареҥгем луктыт да саскам погат, телылан кургым шапашлат. Тымарте 42 тӱжем тонн шудым, 129 тӱжем тонн сенажым, 158 тӱжем тонн силосым аралаш пыштыме. Тидыже тичмаш кӱлешлыкын 97 процентше. Пашам сайын шукташ манын, агропром предприятий- влак у техникым наледат. Идалык тӱналтыш гыч 341 единице ял озанлык техникым да оборудованийым 483 миллион теҥгелан налме. Александр Евстифеев ял озанлык министерствылан район администраций- влак дене пырля пасу пашам терген шогаш да палемдыме планым тӱрыс шукташ темлен.
