Суд пристав- влак эртыше ийын 501 миллион теҥге налог парымым тӱлыктеныт

2019-ше ийыште республикысе суд пристав службо виктемыште налог шотышто ик миллиардат 700 миллион теҥге парымым кӱрын лукташ 38 тӱжем исполнительный производство лийын. МВД пашаеҥ да налог службо виктем дене пырля эртырме рейд- влак почеш суд пристав- влак 501 миллион теҥге налог парымым тӱлыктеныт. 191 миллион теҥгелан 807 арестым ыштыме ыле. Тудыжо 18-ше ий дене таҥастарымаште 5 процентлан ешаралтын. Тидын нерген суд пристав виктемым вуйлатыше Анатолий Иванов эртыше ийысе пашам иктешлымашлан пӧлеклалтше коллегийын заседанийыштыже увертарен. Суд пристав- влак деке шылын коштшо кок тӱжемат пеле наре еҥым ӧкым кондымо, судышко мияш тореш лийше  ик тӱжем утла еҥым кондымо. Тыгак кычалмаште улшо 88 еҥым дежурный частьлашке пуымо. Суд пристав- влакын исполненийыштышт 380 тӱжем производство лийын. Кӱрын лукшаш оксан кугытшо 19 миллиардат 500 миллион теҥгеш шуын. 18-ше ийыште 17 миллиард лийын. Алимент шотышто парым 39 миллион теҥгем эртен, 18-ше ийыште 38 миллион лийын. Ик эн кӱлешан корнылан тыгак ЖКХ ден ТЭК организаций- влаклан тӱлыдымӧ оксам пӧртылтымаш шотлалтеш. 5 тӱжем наре еҥлан Россий деч ӧрдыжкӧ каяш чарыме. Ик ий жапыште 700 миллион наре теҥгеаш 30 тӱжем исполнительный производствым ыштен шуктымо. Тыгак ГИБДД штраф дене кугу паша шукталтеш. Тений январь гыч Федерал закон дене келшышын, суд пристав- влакын статусыштым кӱзыктымӧ. Российысе суд пристав службыжо МВД да Росгвардий семынак тичмаш куатан силовой структурыш савырнен.

Прошлые выпуски