Вашке «Коҥга пайрем» лиеш
12-шо февральыште тошто марий пайрем «Коҥга пайрем» палемдалтеш. Тиде кечын кугезе тукым сурт кӧргын шокшыжо да моторлыкшым чапландареныт. Калык ӱшанымаш почеш, тиде пайрем шошо лишеммым шижтара. Тиде йӱлам Шернур, У Торъял, Куженер районлаште шуктат. Пытартыш ийлаште российысе моло кундемлаштат марий- влак палемдаш тӱҥалыныт. Ожно марлан лекшаш ӱдырлан, сурт дене кылым ынже йомдаре манын, йӱлышӧ пу шӱйым пуэныт. Изи йочалан шинча ынже воч манын, вуй пӧрдемешыже коҥга шӱч дене палым ыштеныт. Йӱлышӧ шӱйым еҥлан пуаш лийын огыл. Тидыже еш пиалым, улан илышым, вольык перкем арален кодаш манын ышталтын. Тиде кечын ятыр ялыште ярминга ден пазар эртаралтын, уна- влакым когыльо да мелна ден вашлийыныт.
