Профессор Ксенофонт Сануковлан- 85 ий
Теҥгече республикыштына да финн-угор тӱняште кумдан палыме шанчыеҥ, историй науко доктор, профессор Ксенофонт Никанорович Сануковын шочмыжлан 85 ий темын. Тидын лӱмеш Марий университетыште академический коллоквиум эртен. Тиддеч ончыч Ксенофонт Никаноровичым мӧҥгыштыжӧ саламленыт. Шанчыеҥлан Республикым вуйлатышын саламлымашыжым да Марий Эллан 100 ий темме лӱмеш «Калык верч тыршымаш» медальым Марий Эл Правительстве председательын икымше алмаштышыже Михаил Васютин кучыктен. Михаил Зиновьевич тудын мер пашашке пыштыме надыржым поснак ойырен палемден.
