Эрла Марий археологий пашалан пӧлеклалтше ончер почылтеш
Эрла историй да археологий тоштерыште 14 шагатлан «Марий археологий: почмаш- влак корнышто» ончер почылтеш. Тудо марий археолог- влакын республикыште да ӧрдыж кундемлаште ятыр ий дене шуктымо пашаштым ончыкта. Тушко поснак ойыртемалтше лектыш- влакым лукмо. Южо коллекцийже калык ончыко икымше гана лукталтеш. Тачысе кечылан археологий сомыл дене МарНИИ-н экспедицийже пашам ышта, Марий университетын туныктымо-шымлыме археологий-этнологий рӱдерже да Евсеев лӱмеш калыкле тоштерын рӱдерышт шымлымашым эртарат. Кажныже марий кундемын историйжым шымлымашке кугу надырым пыштен. Кӱнчымо годым погымо материал негызеш шуко шанче паша возалтын.
