Семёновка селасе катокышто кастенат мунчалташ лиеш
Теле толмеке кажне ийын Семёновка селасе Молодёжный уремыште ий каток почылтеш. Кодшо шумтакечын тенийсе мунчалтыме верым почмашке шӱдӧ утла йоча ден кугыеҥ погыненыт ыле. 2004-ше ий гычак хоккей площадкым ыштыме пашам «Авангард» хоккей клубым чумырышо Александр Лебедев виктара. Тудын тыршымыжлан кӧра 7 гыч тӱҥалын 60 ияш марте хоккейым йӧратыше- влак чумыргеныт. Катокышто оксам тӱлыде, кажне кечын мунчалташ лиеш. Кастене тушто тулым чӱктат.
