Единый кугыжаныш заказчикым ыштымаш подрядчик дене кылым кучымо пашам саемдаш полшен
Республикыште единый кугыжаныш заказчикым ыштымаш калыкле проект- влакым шыҥдарыме годым подрядчик дене кылым кучымо пашам саемдаш полшен. Единый заказчикын сомылжым Капитально чоҥымаш виктем ӱмбак пыштыме. Обязанностьым ик верыш чумырымаш роскотым шагалемдаш, подрядчикым ойырен налмашым терген шогаш, документым чаткан виктараш да срокым эскераш полшен. Тиде тӧнежын пашажлан Марий Элым вуйлатыше Александр Евстифеевын Правительство вуйлатышын икымше алмаштышыже Александр Сальников, чоҥымаш министр Михаил Степанов дене эртарыме вашлиймашыже пӧлеклалтын. Чоҥымаш министрын мутшо почеш, «Маригражданпроектын» зданийыштыже верланыше УКС-лан чыла йӧным ыштыме: у технике ден мебельым налме, пӧлем- влакым олмыктымо, пашаеҥ- влакым чумырымо. Кызыт 30 еҥ тырша. Кодшо ийын виктем чоҥымаш, тазалыкаралтыш, спорт, туныктыш министерствыла деч кусарыме объектла дене пашам ыштен. Кызыт тудо чыла министерстве деч калыкле проектлам виктарыме сомылым поген налеш да кугыжаныш заказчик сомылым шукта. Муниципал образованийлаште улшо чыла объект денат паша виктаралташ тӱҥалеш.
