Волжск олаште начаррак илыше пенсионер- влаклан шокшо кочкышым пуэдаш тӱҥалыныт

                  Волжск олаште начаррак илыше пенсионер- влаклан шокшо кочкышым пуэдаш тӱҥалыныт. Кызытеш илалше- влаклан поро кумыл обедым арняш ик гана гына эртарат. Тыгай тӱҥалтышым ола погынымашын депутатше Алексей Корнеев шке полышкалышыже Дмитрий Толстов дене темленыт. Тудым оласе амалкалче да профтехобразований тӧнеж вуйлатыше- влак авалтеныт. Лишыл жапыште шокшо кочкыш дене чӱчкыдынрак пукшаш да утларак еҥым ӱжаш шонат. Эн ончыч нуно шонымашыштым волжскысо икмыняр кочмыверым вуйлатышылан каласкаленыт. Строительно-промышенынй колледж ден индустриально- технологий техникумын вуйлатышышт келшеныт. Нунын чапле кочмыверышт уло, вара «Лукоморье» кафем вуйлатышат ушнаш кумылаҥын. Шоҥгыеҥ- влак тӱрлӧ илыш саманыш логалыт, южыжын пенсийышт путырак изи але шкаланышт шке шолтен огыт керт. Нуным калыклан комплексный социал полышым пуышо рӱдер гоч ӱжыт. Кызыт организатор- влак полышым пуаш ямде улшо еҥ- влакым ӱжыт.

Прошлые выпуски