Студент- влакым Александр Евстифеев пайремышт дене саламла
Республикым вуйлатыше Александр Евстифеев Российысе студент отряд- влакын кечышт дене саламла. ВУЗ-лаште тунемше- влак ял озанлыкым, чоҥымо пашам, промышленностьым, медициным, экологийым да моло отрасльым вияҥдымашке эре кугу надырым пыштеныт. Ятыр тукым шке студент жапшым поро кумылын шарналта да студент пагыт шке вийым терген ончаш, обществылан кӱлеш улмым шижаш полшен манеш. Студент толкынын кажне ийын пеҥгыдем толмыжо куандара. Студент- влак республикыште гына огыл, Россий мучко пашам ыштат. 2020-шо ий куштылго ыш лий, но калыкым иктыш ушаш полшыш. Коронавирус инфекций дене кучедалмаште самырык тукымын рольжым кажне ен палемда. Тиде неле пагытыштат студент отряд- влакын пашашт кӱрылтын огыл. Мутлан, «Авиценна» отряд Марий Эл ден Татарстанысе мед тӧнежлаште «йошкар зонышто» пашам ыштен. Медицина студент отряд- влакын Российысе форумыштын лектышыже почеш элысе тагаяк отряд- влак коклаште икымше верым сеҥен налын. Тиддеч посна самырык еҥ- влак республикысе чоҥымо пашаште, Краснодар край ден Крымыште сервис да педагогик отрядлаште, Санкт-Петербургышто вагонласе проводник семын тыршеныт. Тыланда да наставник- влакланда поро пашам ыштымыланда, калыклан полшаш тыршымыланда тау. Тек студент пагытда поро событий- влак дене шарнымашеш кодеш,- каласен Александр Евстифеев шке саламлымашыштыже.
