Эрла социал пашаеҥ- влакын кечышт палемдалтеш
Марий Элым вуйлатышын кӱштымыжӧ почеш социал тӧнеж- влаклан ешарен 39 миллион теҥгем ойырымо лиеш. Юрий Зайцев 29 миллион теҥгем йоча тӧнеж- влаклан шым автобусым налаш ойыраш пунчалын. Тиддеч посна идалык мучаш марте кужу жап ончымо системын пилот проектшым пайдалын шыҥдараш социал тӧнеж- влакын материально-технический базыштым уэмдаш да пеҥгыдемдаш эше лу миллион теҥге ойыралтеш. Тидын нерген Юрий Зайцев республикысе социал пашаеҥ- влакын погыныштышт Калык- влакын келшымаш пӧртыштышт ойлен. Тудо ушештарен: Россий Президентын Указше дене келшышын 8-ше июньышто социал пашаеҥ- влакын кечышт палемдалтеш да погынышо- влакым профессионал пайремышт дене саламлен. Юрий Зайцев социал пашаеҥ- влакын тӱрлӧ шӧрынан пашаштым палемден: ешым, ӱдырамаш ден йочам, илалше ден ветеран- влакым социал аралтыш, калыкым социал обслуживаний, Инвалид –влаклан реабилитаций, пашадымылык да паша миграций дене кылдалтше йодыш- влакым виктарен колтымаш. Тидымат ешарен: социал пашаеҥ- влакын сомылышт кӱкшӧ профессионализмым, тӱткышым, калыкым умылымашым йодеш, чылалан тазалыкым, сеҥымашым тыланен да наградым кучыктен. Ойыртемалтше- влаклан Правительствын чап грамотыжым, Республикым вуйлатышын тауштымашыжым пуымо.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
