Тений республикыштына тӱвыра объект- влакым олмыкташ 395 миллион теҥгем ойырат
Тений республикыштына тӱвыра объект- влакым олмыкташ тӱрлӧ кӱкшытан бюджет гыч 395 миллион теҥгем ойырат. Марий Элым вуйлатыше Юрий Зайцев тений «Тӱвыра» калыкле проектым шыҥдарыме йодыш дене совещанийыште участвоватлен. Видеоконференций йӧн дене заседанийым Россий Правительстве Председательын алмаштышыже Татьяна Голикова эртарен. Тений федерал бюджет гыч калыкле проектым шыҥдараш регион- влаклан 24 миллиардат 500 миллион теҥгем ойырымо. Ныл тылзыште тылзе еда палемдыме план почеш чыла показательым шуктымо. Тений да шушаш ий калыкле цельыш шумо да проектын мероприятийже- влакым шуктымо шот дене тӱҥ идалык улыт. Вашлиялтше нелылыкым ончыде, палемдыме мероприятий- влакым жапыштыже шуктыман,- каласен Татьяна Голикова. Марий Элыште идалык мучаш марте ончычсо курчак театрым Марий Самырык театрыш савырен шуктыман, Оршанке да Куженер районлаште кок тӱвыра пӧртым, Руэм йоча сымыктыш школым, Юринысе Лосев лӱмеш Историй да сӱрет тоштерым капитально олмыктен пытарыман. Тиддеч посна Йошкар-Оласе рӱдӧ йоча книгагудо негызеш модельный книгагудым почман, регионысо да муниципал тоштер- влакым технике дене пойдарыман. Тиде пашалан 395 миллион теҥгем ойырымо.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
