Юрий Зайцев Волжскышто корным олмыкташ, а Йошкар-Олаште чарналтыш павильоным да йоча площадкым ышташ кӱштен
Юрий Зайцев Волжскышто корным олмыкташ, а Йошкар-Олаште чарналтыш павильоным да йоча площадкым ышташ кӱштен. Тидын нерген Марий Элым вуйлатыше калыклан приёмым эртарымыже годым ойлен. Йошкар-Ола гыч Лариса Романова Киров уремыште транспортым вучаш чарналтыш павильоным вераҥдаш йодын. Юрий Зайцев вучымо верым тӱзландараш кӱштен. Рӱдӧ ола гычак эше ик ӱдырамаш Галина Рубцова республикым вуйлатыше деч Прохоров уремысе 34-ше А пӧрт воктене йоча площадкым ышташ полшаш йодын. Юрий Зайцев мэр Евгений Масловлан лишыл жапыште тиде йодышым виктарен колташ кӱштен. Волжск ола гыч икымше номеран «Одуванчик» йоча садым вуйлатыше Юрий Зайцевлан оласе калыклан полышым пуэн шогымыжлан тауштен да Ленин уремысе корнын могайрак улмыжлан тӱткышым ойыраш йодын. Республикын бюджетше гыч корным олмыкташ 9 миллион теҥгем ойырымо, но тиде шагал манын. Вуйлатыше тиде проблемым палем, ужынам, корно- влак олмыктымым вучат, сандене йодышым виктарыме лиеш манын каласен. Транспорт да корно озанлык министр Александр Герасименко рашемден: корно фонд гыч ешартыш оксам ойырымеке подрядчикым рашемдаш торг эртаралтеш. Пашам сентябрь мучашлан шуктышаш улыт. Марий Элым вуйлатыше йодыш- влакым решатлаш кӱлеш мероприятий- влакым шукташ да лектыш нерген увертараш кӱштен.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
