Федераций Советыште Юрий Зайцев республикын экономикыжым вияҥдыме шотышто кӱлешан йодыш- влакым нӧлталын
Федераций Советыште Юрий Зайцев республикын экономикыжым вияҥдыме шотышто кӱлешан йодыш- влакым нӧлталын. Федераций Советыште Республикын кечыже- влак кышкарыште Юрий Зайцев экономик политике шотышто комитетым вуйлатыше Андрей Кутепов дене вашлийын. Марий Элым вуйлатыше республикым социал-экономик велым вияҥдыме, индивидуал программым шыҥдарыме лектыш нерген каласкален. Поснак корным чоҥымаште, туризмыште, промышленностьышто сеҥымаш- влакым палемден. Кумдаҥдыме заседанийыште Республикым вуйлатыше Марий Элын инициативыжым Федераций Советын сенаторжо- влакын поддержатлымыштын кӱлешлыкшым палемден. Докладым Марий Эл Правительство вуйлатышын алмаштышыже Дмитрий Троицкий ыштен. Тудо регионын инвестиций шотышто кумылаҥдыше улмыжым, тӱҥ отрасль- влакым вияҥдымаште сеҥымаш- влакым, ял озанлыкыште да промышленностьышто производствын кушмыжо нерген ойлен. Кызыт республике шкаланже шке шылым 429 процентлан, муным 139, пареҥгым 138, саскам 137, шӧрым 104 процентлан ситара. Тӱҥ отрасль- влакын продукцийышт 86 элыш, Российысе 70 регионыш колталтеш. Тӱҥ шотышто машиностроенийын продукцийже, целлюлоз-кагаз сату, кочкыш сату колталтеш. Троицкий ончыкылыкан моло отрасль нергенат ойлен. Мутлан, радиоэлектронике нерген. Но икмыняр чарак уло манын. Тиде йодышым Федераций Советын пунчалышкыже пурташ темлен.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
