Колым кучымо пашам иктешлыме
2020-шо ийыште колым кучымо пашамат иктешлыме. Тиде сомылым эртыше ийын 47 тӱжем утла гектар кумдыкым айлыше 23 кучымо верыште шуктымо. Нуно Куйбышев да Чебоксар вӱдаралтышыште верланеныт. Эртыше ийын колым кучышо организаций- влак чылаже 440 тонн утла колым кученыт. Промышленный йӧн дене кучымо 22 тӱрлӧ кол гыч эн шукыжо ловалым лукмо- 86 тонн, шереҥге- 79, талдаш- 69 тонн утла лийын. Тидын нерген пӱртӱс поянлык министерстве увертара.
