Марий Эл Кугыжаныш Погынын кумшо сессийже лийын
Таче Марий Эл Кугыжаныш Погынын кумшо сессийже пашам ыштен. Тушто 15 йодышым ончен лекме. Эн ончыч Вера Баранова ден Маргарита Поповам Звенигово да Шернур суд участкылан мировой судьяштлан пеҥгыдемденыт. Вара ийготыш шудымо- влаклан электрон сигаретым да вейпым ужалымашым чарыме нерген» у законым пеҥгыдемденыт. Пеҥгыдемдыме вес законжо алкоголь сатум ужалымаш дене кылдалтын. Тудо 22 шагат гыч 9 шагат эр марте ужалаш чарыме законым 2020-шо ийын 1-ше апрель марте ыштыме ыле. Ынде срок деч посна тудо закон эре вийыште лиеш. Республикын паша ветеранже лӱмым пуымо порядкым федерал закон дене тӧр кондымо. Ынде ийгот шот дене страховой пенсийым палемдыме марте 60 ийыш шушо пӧръеҥ да 55 ийыш шушо ӱдырамаш- влак 45 да 40 ий деч шагал огыл паша стажышт уло гын, Пашан ветеранже лӱмым налын кертыт. Тыгак икмыняр законыш вашталтышым пуртымо. Сессийыште чылаже республикын 12 законжым да Кугыжаныш Погынын 18 пунчалжым пеҥгыдемдыме.
