Марий Эл деч сенатор Сергей Мартынов Шернур районыш миен
Теҥгече Федераций Советын оборона да лӱдыкшыдымлык шотышто Комитетшым вуйлатышын икымше алмаштышыже, Марий Элын представительже Сергей Мартынов паша дене Шернур районыш миен. Сенатор дене Марий Эл Правительстве председательын икымше алмаштышыже Сергей Сметанин Николай Заболоцкий лӱмеш кокымшо номеран кыдалаш школышто лийыныт. Тений тиде тунемме тӧнеж 30 ияш лӱмгечыжым палемден. Кугу уна- влак физике, химий, математике кабинетлаш пуреныт. Нуным у тунемме ийлан сайын олмыктымо, у тунемме пособийым, кӱлеш оборудованийым налме. Сергей Мартынов тыгак Боевой Чап залым ончен. Тушто митинг ден патриотизм шӱлышеш шуарыме урок- влак эртат. Икымше зампред ден сенатор школын спорт базыжымат онченыт. Тушто кучедалмаш ден бокслан да модашлан кок спортзал уло, бассейн пашам ышта. Пеш шуко секций уло, школ 10-11 шагат йӱд марте ок петыралт. Вара Сергей Сметанин ден Сергей Мартынов туныктышо- влак дене вашлийыныт. Тушто шуко темым нӧлталме. Тиддеч вара нуно школ негызеш пашам ыштыше йоча музыкальный школыш пуреныт. Мылам тиде школын шӱлышыжак келша. Тыште чыла туныктышо- влакын кидышт дене ышталтеш. Сандене ласкалыкым да йӧнан улмыжым шижат, -каласен Сергей Мартынов. Вара школын лӱмгечыже лӱмеш, книгагудылан у книга- влакым пӧлекленыт.
