Марий Элыште пенсионерлан илен лекташ ситыше оксан кугытшым палемдыме
2020-шо ий январь гыч Марий Элыште пенсий деке федерал социал ешартышым пуаш манын, пенсионерлан илен лекташ ситыше оксан кугытшым 8 тӱжемат 380 теҥгем ыштыме. Тыгай ешартыш окса пашам ыштыдыме пенсионер- влаклан гына палемдалтеш. Тений социал ешартышым пуымо радам вашталтын. Ынде пенсийым ешартыш окса полшымо дене илен лекташ ситыше кугыт марте шуктат, а тиде эн изи кугыт ӱмбаке пенсийым индексироватлыме ак ешаралтеш. Тыге 8 тӱжемат 380 теҥге деч шагал парышым налше пашам ыштыдыме пенсионер- влак январьыште тиде ак деке 6 процентат 6 луаш процент индексацийым ешарен налыт. Мутлан, страховой пенсий 6 тӱжемат 535 теҥге. Илен лекташ ситыше окса кугыт 8 тӱжемат 380 теҥге. Тугеже пенсионерын парышыже изи окса ден шагал. Сандене федерал социал ешартышым палемдыме. Тудо тӱжемат 845 теҥге лиеш. Январь гыч индексаций 6,6 процент- тидыже 431 теҥге лиеш. Тыгеже 6 535 теҥге пенсий, тӱжемат 845 теҥге ешартыш полыш да 431 тене индексаций. Тичмашыже 8 тӱжемат 811 теҥге лиеш. Пенсионерын тичмаш парышыже илен лекташ ситыше окса деч 431 теҥгелан шукырак лиеш. Ушештарена: пашам ыштыдыме пенсионерын парышыжым шотлымо годым пенсийым гына огыл, моло ешартыш оксамат шотыш налыт: социал полыш наборын акшым, моло социал полышым. Республикыште ешартыш федерал социал оксам 21 тӱжем утла еҥ налеш.
