Республикым вуйлатыше Марий Элысе ончылъеҥ- влаклан У ий деч ончыч вашлиймашым эртарен
Эрик Сапаев лӱмеш опера да балет театрыште Республикым вуйлатыше У ий вашеш торжественный приёмым эртарен. Александр Евстифеев кучем органын, мер оргаизаций- влакын еҥыштлан, шанче да тӱвыра пашаеҥ- влаклан, предприятий вуйлатыше- шамычлан ушештарен: республикылан эртыше идалык сай лектышан лийын. Республикым вияҥдымаште калыкле проект- влак сай полыш лийыныт, нуно илышын тӱрлӧ шӧрынжӧ дене кылдалтыныт. Федераций Советын полышыж дене шуко йодышым виктарен колтымо. Сенатор- влаклан шуктымо паша шотышто отчётым ыштыме. Шушаш ийын ме республикын 100 ияш лӱмгечыжым палемдаш тӱҥалына. Тиде лӱмлӧ датылан сайын ямдылалташ кӱлеш. Республикым вуйлатышын мутшо почеш, социал кӱлешан объект- влакым чоҥымо паша умбакыже шуйна, ава да йоча- влаклан полшымо сомыл шукталтеш. Чыла сеҥымаш тыршен ыштыме пашалан кӧра лийын. Кажне регион шке калыкше дене ойыртемалтеш. Марий Кундемым вияҥдымашке пыштыме надырланда тау, - каласен Александр Евстифеев. Мучашлан Марий Элым вуйлатыше чыла погынышо калыкым шушаш У ий пайрем дене саламлен. Мероприятий опера да балет театрын ончыктымо мотор концерт дене мучашлалтын.
