Марий Элым вуйлатыше Морко районысо социал кӱлешан объектлашке миен
Арня мучашыште Марий Элым вуйлатыше Морко районысо социал кӱлешан объектлашке миен. Эн ончыч тудо Кокласаола ялыш пурен. Тушто лицейыште тунемше- влаклан малыме корпусым чоҥаш кӱлеш. Тиде йодышым шукертак каҥашыме, а 2014-ше ийыште чоҥаш тӱналме, мланде йымал ужашыжым гына ыштен шуктымо да паша чарнен шогалын. Лицейын директоржо Сергей Михайловын мутшо почеш интернат моло ялла гыч толшо- влаклан кӱлеш. Кызыт тушто 417 йоча тунемеш. Тӧнежлан кодшо ийын республике кӱкшытан статусым пуымо. Тыште тунем лекше- влак элысе престижный вузлашке тунемаш пурат. Интернат кӱлеш, проект да смете документацийым ямдылыман. Каҥашена да йодышым виктарен колтена, - манын шонем, каласен Юрий Зайцев. Республикым вуйлатышын мийыме эше ик тунеме тӧнеж- Унчо кыдалаш школ. Тушто тунемме корпусын кокымшо ужашыжым чоҥымо дене нелылык лектын. Икымшыжым 2007-ше ийыште чоҥымо, кокымшыштыжо паша чарнен шогалын. Кызыт йоча- влак кок зданийыште тунемыт, иктыже- пу гыч ыштыме. Юрий Зайцев тыгак магистраль газпучын Моркысо линейный производственный виктемышкыже миен. Ончен лекмеке республикым вуйлатыше совещанийым эртарен. Тушто корным чоҥымо да олмыктымо, тунемме тӧнеж да илыме верым чоҥымо йодышым радамлен каҥашыме. Чоҥен пытарыдыме ик объектше- Морко посёлкышто медицина пашаеҥ- влаклан илыме пӧрт. Юрий Зайцев палемден: илыме вер йодышым виктарымаш медик- влакым ял кундемыш пашаш толаш кумылаҥден кертеш. Сандене тудым чоҥен шуктыман.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
