Марий Элым вуйлатышын пашажым шуктышо общественник- влакым республикым вияҥдыме стратрегийым ыштымашке ушнаш ӱжын

            Республикысе Общественный палатын кумдаҥдыме заседанийыштыже Марий Элым вуйлатышын пашажым шуктышо Юрий Зайцев палемден: вияҥме корным рашемдыман, раш цельым шындыман. Тыште кучем ден калык пырля пашам ыштышаш улыт. Молан манаш гын, вияҥме стратегий эн очычак калыкын йодмыжым шотыш налже да нунын илышыштым саемдаш полшыжо. Юрий Зайцев общественник- влаклан каласен: федерал кучем органын шындыме задачым Марий Эл чаткан шукта, но лач республикыш виктаралтше инициативе шагал. Вияндымаште ончыкылык корно семын республикым вуйлатышын пашажым шуктышо социал политикым, налогым тӱлышӧ базым ешарымым, кӧргӧ туризмым, ял озанлыкым палемден. Чыла тидыже калыкын илыш качествыжым саемдаш полшышаш.
            Мемнан чыла проблемын 90 процентшым пален нальым, шкаланем посна паша- влакым рашемдышым. Нуно ӱмбалнак кият. Южо отрасльым эре шӱкен шогыман. Тиде- социал сфера. Мо кӱлешыже-ышталтеш- тӱрлӧ выплате да молат. Но республике деч шукырак лиеш гын сай ыле. Но кызытеш мо уло, тудо уло. Туризмым вияҥдаш механизам- вак улыт. Мутлан, Шереметев замкым олмыкташ шийвундо ок сите. Кеч тудо федерал кӱкшытан поянлыклан шотлалтеш. Налогым тӱлымӧ базе шотышто ойлаш гын, санкций жапыште предприятий- влак ончылно у йӧн- влак шочыныт, нунын куатышт кугу, полышым пуаш гына кӱлеш.
            Вияҥме эше ик точкылан ял озанлык шотлалтеш. Ончыч кучылтмо оксам пӧртылтеныт. Тӱня мучкоат ял озанлыклан окса ойыралтеш. Кызыт субсидий шагалемеш. Южо регионышто ситыдыме оксам компенсироватлат манын ойлат. Меат кертме семын тидым ышташ шонена.- каласен Юрий Зайцев.
             Марий Элыште моло кундем дене таҥастарымаште «Ай-Ти компаний- влакын кластерыштым ыштыме. Тудо импортым вашталтыме шотышто сай шӱкалтышым ыштен кертеш. Сандене нунын дене сай кылым ыштыман. Марий Элым вуйлатышын пашажым шуктышо Юрий Зайцев ӱшаным каласен: общественностьын еҥже- влак у ойыртемалтше шонымаш- влакым темлен кертыт. Молан манаш гын, нуно чыла йодышым кӧрго гыч палат.
             Фото: Марий Элым вуйлатышын организаций да аналитик виктемже.

Прошлые выпуски