Марий Элын спортсменже- влак йӱдвел коштмаш дене элыштына кум эн сай- влак радамыш пуреныт

           Марий Элын спортсменже- влак йӱдвел коштмаш дене элыштына кум эн сай- влак радамыш пуреныт. Тиде кечылаште «Корта» тунемме да тренироватлалтме базыште спорт туризмын «Йӱдвел коштмаш» видше дене Российын чемпионатше эртен. Мемнан спортсмен- влак команде коклаште кокымшо верым сеҥен налыныт. Турнирыш элысе 12 субъект гыч 94 спортсмен погынен. Сеҥыше- влак тыге радамлалтыныт: пӧръеҥ- влак коклаште икымше вер Удмуртий гыч Евгений Филатовлан логалын. Кокымшо верыш Чуваший гыч Сергей Кузнецов лектын. Кумшо верым Марий Эл гыч Вячеслав Демьянов сеҥен налын. Ӱдырамаш- влак коклаште икымше вер дене Санкт-Петербург гыч Ирина Маркова палемдалтын, кокымшо верым Марий Эл гыч Ксения Мубаракшина налын, кумшо верыш Угарман область Светлана Кузьменко лектын. А команде- влак коклаште эн сайлан Санкт-Петербургын командыжым шотлымо, Марий Эллан кокымшо вер логалын, кумшо верым Чуваш республикын командыжлан пуымо. Ушештарена: йӱдвел коштмаш дене Росийын чемпионатше икымше гана эртаралтын.
             «ВКонтакте» вотышто «Марий Элыште спорт» группын фотожо.

Прошлые выпуски