Киселёвмыт ешлан «Йӧратыме да ӱшанле улмылан» медальым кучыктеныт
Киселёвмыт ешлан «Йӧратыме да ӱшанле улмылан» медальым кучыктеныт. Еш, йӧратымаш да ӱшанле улмо кечын Марий Эл Правительстве председательын алмаштышыже Ольга Фёдорова Марий Элым вуйлатышын пашажым шуктышо Юрий Зайцевын кӱштымыжо почеш Киселёвмыт еш мужырым саламлен да медальым кучыктен. Александр Васильевич ден Валентина Петровна тений пырля илымыштлан 55 ий теммым палемдат. Нуно ӱмыр мучко эре пырля улыт. 40 ий утла полупроводник прибор- влак заводышто тыршеныт. Сурт оза чолга рационализатор да новатор, ятыр ий сонарзе да колызо- влак обществым вуйлатен. Оза вате пелашыже деч почеш кодын огыл, заводысо чыла мероприятийыште участвоватлен, женсоветым вуйлатен. 2008-ше ийыште пырля пенсийыш лектыныт. Наталья ден Алексей икшывыштат тыгаяк чолга кушкыныт, паша корныштым тиде заводыштак тӱналыныт.
Фото: Марий Эл Правительстве.
Фото: Марий Эл Правительстве.
