У магистраль корнын ужашыже сентябрьыште почылтшаш

             У магистраль корнын Ленин проспект деч Луначарский урем марте ужашыже транспортлан сентябрьыште почылтшаш. Тидын нерген Марий Элым вуйлатышын пашажым шуктышо Юрий Зайцев ден Федерал корно агентствым вуйлатыше Роман Новиковын объектыш мийымышт годым подрядчик увертарен. Магистраль уремын икымше йыжыҥже 80 наре процентлан ямде. Марий Эл Правительстве председательын икымше алмаштышыже Александр Сальников уна- влаклан тиде корнын кӱлешлыкше нерген ойлен. Малыме ден промышленный районым ушымо дене пырля Ширяйково микрорайоным вияҥдаш шӱкалтышым ышта. Тушто вич аварийный пӧртым кораҥден, Изи Какшан воктене шуко пачашан пӧртым нӧлташ палемдыме. Пӧрт гыч олан рӱдышкыжӧ ончаш лиеш. Корнын икымше йыжыҥжым ыштен шукташ кок миллиарат 400 миллион теҥге кучылталтеш.
              Кокымшо йыжыҥже кок меҥгат пеле кужытан лиеш. Тушто путепроводым чоҥыман. Тидлан ныл ий наре жап кайышаш, акше вич миллиарат 900 миллион теҥгеш шуэш. Паша дене коштмо жапыште тыгак Йошкар-Ола ден Медведево посёлкым ушышо корным олмыктымо нерген ойлымо. Корнын кужытшо 6 меҥге наре погына. Проект почеш тудо 6 полосан лийшаш. Тушто тротуар, велокорно, тул волгыдо, йӱрвӱд канализаций, транспорт развязке, путепровод да йолешке вончем- влакым ышташ палемдыме. Объектын тичмаш акше 6 миллиардат 200 миллион теҥге, паша жапше - ныл ий.
             Фото: Марий Элым вуйлатышын организаций да аналитик виктемже.

Прошлые выпуски