Марий Элысе калык изирак пачер да пӧртым чоҥа
Марий Элысе калык изирак кумдыкан илыме верым чоҥаш тӱҥалын. Республикына мучко тӱрлӧ оксам кучылтын, тенийсе шым тылзыште кок тӱжемат 87 пачерым чоҥымо. Кодшо ийысе тыгаяк жап дене таҥастарымаште площадьше ик чырыклан ешаралтын. Посна оза- влак 621 пӧртым нӧлтеныт. Тудын кумдыкшо 76 тӱжем утла квадрат метр. Тидыже кодшо ийысе деч 16 процентлан шагалрак. Калыкын чоҥымо илыме вер тӱшка чоҥымо деч 49 процент лиеш. Кодшо ий август гыч закон почеш сад участкылаштат илаш йӧрышӧ пӧртым чоҥаш лиеш. Но ик ий жапыште ик пӧртымат чоҥымо огыл. Тений чоҥымо пачерын да посна пӧртын кокла кумдыкшо 74 квадрат метр лийын, ӱмаште 91 квадрат метр улмаш. Шуко пачеран пӧрт- влакым Йошкар-Олаште, Волжскышто, Волжский, Медведево, Советский районлаште чоҥат. Моло верыште посна оза-влак гына пӧртым нӧлтат.
