Марий Элыште Крымын Российыш пӧртылмыжлан пӧлеклалтше 100 утла мероприятий эртаралтеш
Марий Элыште Крымын Российыш пӧртылмыжлан пӧлеклалтше 100 утла мероприятий эртаралтеш. Таче Крымын статусшо шотышто референдумым эртарымылан шым ий темеш. Тушто пелотрошто илыше 95 процент утла калык Россий дене ушнышаш верч шке йӱкшым пуэн ыле. 18-ше мартыште Крым республике ден Севастополь ола официально Российын радамышкыже пуреныт. 2015-ше ий гыч тиде - Крым ден Рооссийын ушнымо пайрем кече. Тидын лӱмеш Марий Элыште акций ден викторина, выставке дене концерт да мутланымаш- влак эртат. Мутлан, 18-ше мартыште историй да археологий тоштерыште «Пырля!» акций лиеш, Православийын историй тоштерыштыже «Руш Лемнос» ончер почылтеш, Сӱрет галерейыште Кугыжаныш Руш тоштерын коллекцийыже гыч сӱретче Иван Айвазовский нерген «Теҥызын тулан поэтше» фильмым ончыктат, тӱс сымыктыш тоштерыште «Крымын сӧралже» онлайн- викторина лиеш. Благовещений башньыште Крым нерген фотосӱрет- влак ончыкталтыт, Чавайн лӱмеш книгагудо книга выставкыш ӱжеш. Мероприятий- влак тыгак чыла ола ден районлаште лийыт.
