Марий Элыште «Тӱвыра» калыкле проект почеш чыла семӱзгарым жапыштыже кондымо
Марий Элыште «Тӱвыра» калыкле проект почеш чыла семӱзгарым жапыштыже кондымо. Кум йоча сымыктыш школ да Палантай лӱмеш тӱвыра да сымыктыш колледж тений налаш палемдыме чыла семӱзгар ден оборудованийым налыныт. Тӱрлӧ кӱкшытан бюджет гыч Параньга посёлко, Микрак села, Волжск ола, Палантай лӱмеш колледжлан 17 миллион утла теҥге оксам ойырымо ыле. Тиде окса дене рояльым, пианиным, баяным, кӱслем, духовой оркестрлан семӱзгар комплектым, компьютер техникым, тунемме литературым да моло тунемме оборудованийым налме. Планатай лӱмеш колледж пел курымлан икымше гана тӱнямбалне кумдан палыме «Стейнвей» компанийын у концерт рояльжым налын. 2024-ше ий марте «Тӱвыра» калыкле проект кышкарыште республикысе 12 тунемме тӱвыра тӧнежлан семӱзгарым налаш палемдыме,- увертара тӱвыра министерствын пресс-службыжо.
