Ондалкалыше еҥ ӱдырамаш ӱмбак 700 тӱжем утла теҥгеаш кредитым возыктен
Ондалкалыше еҥ Медведево район гыч ӱдырамаш ӱмбак 700 тӱжем утла теҥгеаш кредитым возыктен. Полицийын дежурный частьышкыже 37 ияш ӱдырамаш йодмаш дене толын. Тудын мутшо почеш, икмыняр кече ончыч палыдыме еҥ йыҥгыртен да банкын пашаеҥже улам манын. Пуйто осалым шонышо- влак ӱдырамаш лӱмеш кредитым возаш тӧчат манын увертарен. Тидым ышташ пуаш огыл манын, пурышо смс-уверла гыч код- влакым увертараш йодын. Ӱдырамаш ӱшанен. Молан манаш гын, тудым лӱм да ача лӱм дене лӱмден, паспорт данныйжым чын каласен. Кӱлеш уверым налмеке, ӱдырамаш ӱмбак кредитым возыктен да 720 тӱжем теҥгем налын. Кредит почеш тӱлаш шижтарымаш толмеке гына, ӱдырамаш ондалалтмыжым умылен. МВД ушештара: тыгай еҥ- влак ямдылыме схеме дене ондалкалат, тидын годым психологий могырым сайын ӱшандарен моштат.
