Марий Элыште туризмым вияҥдыме 60 проектым шыҥдарыме лиеш
Марий Элыште туризмым вияҥдыме 60 проектым шыҥдарыме лиеш. Марий Элым вуйлатыше Юрий Зайцевым республике кундемыште туризмым вияҥдыме концептуал мастер- план дене палдареныт. Мастер-планыш 200 утла инициативе гыч 130 проектым пуртымо. Проект кышкарышке икшыве дене пырля еш канышымат пуртымо. Кугу тӱткышым турист кластерым вияҥдымылан ойырымо. Тушко Изи Какшан эҥер серым тӱзландарымаш, Воскресенский проспектым пужен ыштымаш, Йошкар-Олаште «Республика в миниатюре» парк-тоштерым ыштымаш, Медведево ипподромым вияҥдымаш да Чуркан ен воктене каныме базым ыштымаш пурат. Республикын касвелныже Козьмодемьянск олам кокымшо кугу турист рӱдерыш савыраш палемдалтеш. Тушко олан рӱдыжым, Юл эҥер серым, Шереметев паркым тӱзландарымаш да «Юрино» да «Пазар площадь» турист рӱдерлам ыштымаш пурат. Документым «Стратеджи Партнерс Групп» Сбербанк ПАО дене пырля ямдыленыт. Мастер-планым шыҥдарымаш турист- влакым кумылаҥда гына огыл, ешартыш пашавер- влакым почеш. Ончыл проектлашке инвестицийын тӱшка кугытшо 10 миллиардат 800 миллион теҥгеш шуэш. Тидыже тӱжемат 600 у пашаверым почаш да идалык еда бюджетыш 940 миллион теҥге налогым кондаш полша. Юрий Зайцев каласен: мастер-план- тиде концепций. Кугу паша вуча. Документым ончыкылык инвестор- влаклан ончыктыман. Могай пайда лиеш, мыняр жап гыч инвестиций шкенжым шке сула да парышым кондаш тӱҥалеш- раш умылтараш кӱлеш. Республикым вуйлатыше Марий Элын турист куатшым палемден да ушештарен: Моско деч 700 меҥге тораште гына улмо, Юл эҥерын воктенак йогымыжо, Шереметев замок шотан историй поянлыкын улмышт инвестицийлан кумылаҥдыше улыт. Мастер-планым шыҥдараш кугыжаныш программе ден калыкле проектлам шотыш налын, посна инвестор- влакым кумылаҥдыман.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
