«Марий краевед» клуб черетан заседанийыш вуча
Чавайн лӱмеш калыкле книгагудышто 7-ше октябрьыште 15 шагатлан «Марий краевед» клубын черетан заседанийже лиеш. Тиде гана тудо РСФСР школын сулло туныктышыжо, СССР-ын калык туныктышыжо, калык просвещенийын отличникше Пётр Емельяновлан пӧлеклалтеш. Пётр Емельянович илышыжын 42 ийжым марий школлан кадрым ямдылыме пашалан пӧлеклен. Талантан туныктышо Оршанке педучилищыште туныктен да тушто марий школ пӧлкам негызлышылан шотлалтеш. Марий йылме дене 17 тунемме программым, ятыр методик пособийым, тӱҥалтыш класслаште туныктышо да студент- влаклан учебникым ямдылен. Совет ушемысе да Российысе газет дене журналлаште да академический савыктышлаште тӱжем утла статьям савыктен. Клубын заседанийышкыже краевед, Пётр Емельяновичын коллегыже ден выпускникше- влакым ӱжыт.
