Республикысе МВД-ште Калык переписьын ойыртемже нерген ойленыт
Республикысе МВД-ште Калык переписьын ойыртемже нерген ойленыт. Тудыжо 15-ше октябрьыште тӱҥалеш да 14-ше ноябрь марте шуйна. Ведомство шижтара: тиддеч ончыч переписьым эрташ темлыше еҥ- влак ондалкалыше лийын кертыт. Переписчик- влакым куштылгын палаш лиеш. Нунылан лӱмын жилетым, шарфым, символикан сумкам ямдыленыт. Йодышташ тӱҥалме деч ончыч переписчик удостоверенийым паспорт дене пырля ончыктышаш, перепись нерген умылтарышаш улыт. Тидымат палыман: йодыштмашым уремыште але кудывечыште эртараш ок лий. Тыгак телефон дене переписьым эрташ йыҥгыр але СМС-увер пура гын, нимогай уверымат каласыман огыл. Переписчик мӧҥгыштӧ иктымат верештын огыл гын, почто яшлыкыште кушто переписьым эрташ лийме нерген листовкым кода. Возен налме лаштыкыш уверым йодыштмо еҥын шомакше гыч гына возат. Нуно паспорт данныйым але илыме верын озаже шотышто йодышым огыт пу. Каласаш лийдыме данный нунылан ок кӱл, переписьым эртымылан оксам огыт нал, переписчик агитацийым ок эртаре, сату ден полышым ок темле. Кокытеланымаш лекме годым лишыл переписной участкыш йыҥгыртман, ондалаш шонышо еҥ- влак нерген 102 але 112 номеран телефон дене але участковый деке йыҥгыртен увертарыман.
Фото: МВД.
Фото: МВД.
