Москосо тӱнямбал марафонышто Людмила Лебедева 7-ше верыш лектын
Марий Эл гыч куржталше спортсменка Москосо тӱнямбал марафонышто 10 меҥгыш куржмаште 7-ше верыш лектын. Марафон рушарнян Моско эҥер сер да Садовый кольцо мучко эртен. Людмила Лебедева тиде кужытым 34 минутат 30 секундышто куржын да вич тӱжемат 600 участнице коклаште шымше толын. Сеҥышыш элын чемпионкыжо Елена Коробкина лектын. Тудлан 10 меҥгым эрташ 31 минутат 49 секунд ситен. Пӧръеҥ- влак коклаште сеҥышыш Владимир Никитин лектын. Тудо тиде кужытымак 28 минутат 22 секундышто эртен. 42 меҥгат 200 метр кужытан марафонышто Тольятти гыч пӧръеҥ да Якутск гыч ӱдырамаш сеҥышыш лектыныт.
