Параньгаште вӱд чылалан сита
Параньга посёлкысо вӱдым ситарыме системым ышташ шым миллионат 500 тӱжем теҥге колталтеш. Тидын шотышто республикым вуйлатыше расопряжениеш кидшым пыштен. Александр Евстифеев йӱшаш вӱд калыклан тичмаш ситыже манын, илемыште вӱдым ситарыме йодышым виктарен колташ кӱштен. Водозабор суткаште 480 кубометр вӱдым пуэн кертше лийшаш. Кок артезиан скважиным, 50 кублан башньым, 700 метр полиэтилен вӱд пучым ыштыме лиеш. Кызыт посёлкысо 480 еҥ илыман икмыняр уремыште вӱд ситыдымаш палдырна.
