Пенсий пӧлка шуктымо пашажым иктешлен
Россий пенсий фондын республикысе пӧлкаштыже кодшо ийысе пашам иктешленыт. Заседанийыште правительстве председательын алмаштышыже Илга Дравниеце, социал вияҥмаш министрын алмаштышыже Дмитрий Солдатов, профсоюз организаций- влак ушемыштым вуйлатыше Ольга Цветкова, пенсионер- влак ушемын верысе пӧлкажым вуйлатыше Людмила Ефремова, ОНФ-ын верысе исполкомжым вуйлатыше Надежда Ефремова лийыныт. Пенсий пӧлкам вуйлатыше Владимир Орехов пашам иктешлышыла палемден: калык ончылно налме чыла обязательствым тӱрыс шуктымо. 2019-ше ий мучашлан республикысе пенсий виктемлаште 212 тӱжемат 400 утла еҥ шотлалтын. 2018-ше ий дене таҥастарымаште пенсионерын чотшо тӱжемат 184 еҥлан шагалемын. Страховой пенсийын кокла кугытшо 12 тӱжемат 726 теҥгеш шуын, шоҥгемме шот дене страховой пенсий 13 тӱжемат 529 теҥге лийын. Эше ик пале событий семын тидым аклыман: кодшо ийын икшыван еш- влаклан полыш семын еш капиталлан 50 тӱжем теҥгеаш кугыжаныш сертификатым пуымо. Талукын лектышыже почеш эн сай территориальный орган- влакым палемдыме. Нунын коклаште Йошкар-Оласе виктем, Звенигово, Медведево, Морко районласе виктем да Козьмодемьянск оласе виктем улыт. Заседанийыште тыгак тенийлан тӱҥ задаче- влакым палемденыт.
