Рӱдо оласе 9-ше микрорайонышто кок кӱкшытан кок развязкым ышташ шонат
Рӱдо оласе 9-ше микрорайонышто кок кӱкшытан развязке куд миллиардат 240 миллион теҥгем шогаш тӱҥалеш. Проект кок йыжыҥ дене чоҥалташ тӱҥалеш. Тичмаш налмаште ныл ий шуйна. Икымше йыжыҥыште Йыван Кырла ден Строитель урем корнывожышто кок уровенян транспорт развязкым ышташ да Йыван Кырла уремжымат пужен ыштышаш улыт. Кокымшо йыжыҥыштыже Йошкар-Олаш пурымо корно ден Руэм посёлко воктенысе кӱртньӧ корно корнывожышто тыгак кок уровенян развязкым ыштышаш улыт. Пужен ыштыме корнын тичмаш кужытшо вич меҥгат 500 метрыш шуэш. Корнышто нылыт гыч кудыт марте полоса, корно гоч кок кӱшыл йолешке вончем лиеш. Проект почеш тыгак велокорно, тротуар, йӱрвӱд йогымо пуч да тулволгыдым ыштышаш улыт.
Фото: «Марийская правда», МедиаПоток.
Фото: «Марийская правда», МедиаПоток.
