Шушаш ийын тӱҥ событийже- влак
Марий Элым вуйлатыше Александр Евстифеев республикысе мер ушем- влакын еҥышт дене вашлиймашым эртарен. Мутланымашын тӱҥ темыже- шушаш ийысе тӱҥ событий- влак дене кылдалтын. Тиде -Кугу Ачамланде сарыште сеҥымылан 75 ий темме да Республикын 100 ияш лӱмгечыже. Республикым вуйлатыше ушештарен: Президентын увертарыме Шарнымаш да Чап идалыкыште республикыштына самырык тукымым патриотизм шӱлышеш шуарыше эн сай районым, школым, туныктышым рашемдыме конкурсым эртараш палемдыме. Школ ден туныктышо коклаште сеҥыше икте гына лийшаш огыл. Нунылан могай- гынат грантым ыштыман. Шӱдӧ ияш лӱмгечым палемдаш ямдылалтме йодышым ик гана веле огыл федерал кӱкшытыштат каҥашыме. Шомак пайрем мероприятий- влак нерген гына огыл лектын, а утларакше илышын чыла шӧрыныштыжат вашталтыш лийшаш манын каласыме. Экономик, социал, самырык тукым шуарыме йодыш-влакым виктарен колтыман. Сулен налше еҥ- влакым наградитлаш кӱлеш, пайрем деч вара ӧпкелалт кодшо еҥ лийшаш огыл. Сандене чыла шоналташ кӱлеш. Тиде пашаште мер калыкын рольжо кугу лийшаш. Ончылно эше 400 кече уло. Палемдыме корно дене чыла сомылым ончен лекман, - каласен республикым вуйлатыше. Эше ик теме- тиде общественный контроль. Шушаш ий калыкле проект- влакым чолган шыҥдарыме идалык лийшаш. Тудым эскерен шогыман. Тендан деч тидын шотышто полыш лийшаш,- каласен Евстифеев. Сенатор Константин Косачёв эше ик темым тарватен. Южо йотэлын еҥже- влак Кугу Сеҥымашыште Российын надыржым ӱлык шындаш да историй факт- влакым кораҥдаш тыршат. Тидым ышташ пуыман огыл. Чапым аралымаште Мер организаций- влакынат рольышт кугу. 100 ияш лӱмгече калыкын икоян улмыжым ончыкташ сай йӧн лиеш, манын тудо. Тыгак Россий кумдыкышто Республикын лӱмжым кӱшнӧ кучымо нергенат ойлымо. Айдемын праваже шотышто уполномоченный Лариса Яковлева 100 ийым палемдымашке моло кундемлаште илыше марий- влакымат ушаш темлен. Тӱвыра министр Константин Иванов лӱмгече вашеш ятыр объектым пужен ыштыме да олмыктымо нерген ойлен. Тӱвыра программе- влак ямдылалтыт манын. МарНИИ-м вуйлатыше икмыняр кугу проект ямдылалтме нерген каласкален. Республикын историйже нерген мотор книга ямдылалтеш, сар нерген книга- влакын электрон спискышт уэмдалтеш, студент- влаклан лекций шамыч эртаралтыт. Марий автоном областьын исполком советшым вуйлатыше Иван Петровлан чапкӱм ышташ темлымашым паддержатлымылан таум каласен. Республикым вуйлатыше марий йылмым вияҥдыме ончыкылык план нерген каласен. Тудым ямдылаш тӱвыра министерстве МарНИИ-лан заказым ыштышаш. Бюджетыште оксам палемдена, - манын тудо. Тошто Крешын ялыште ремесло пӧртым вуйлатыше Виталий Кудрявцев калык промыслым вияҥдыме йодышым нӧлталын. Евстифеев тудын темлымашыже- влакым возен пуаш йодын. Погынымашым иктешлышыла, тыгай вашлиймашын пайдалыкшым да кӱлешлыкшым палемден.
