Йошкар-Олаште ятыр кундем гыч бизнесъеҥ- влак вияҥме корным каҥашеныт
Республикым вуйлатыше Александр Евстифеев бизнесым вияҥдыме «Про.Бизнес 2019» Регион- влак кокласе форумышто участвоватлен. Мероприятий кок форумым ушен: «Марий Эл- вияҥме кундем» да «Шукырак оксам ыштен нал- сатум экспортыш колто». Тушто Моско, Санкт-Петербург, Угарман, Озаҥ, Киров, Липецк, Магнитогорск, Самара, Саранск да Марий Эл гыч 600 наре участник лийын. Мутланымаш «Изи да кыдалаш предпринимательствым вияҥдыме да кугыжаныш велым полыш» тӱҥ теме дене эртен. Республикым вуйлатышын мутшо почеш, бизнес регионым экономически вияҥдымаште кугу верым налеш. Нунылан регионысо валовый продуктын 30 утла процентше логалеш. Пашам ыштыше калыкын ик чырык ужашыже тиде сферыште тырша. Республикыште бизнеслан полшымо негызым ыштыме. Лектыш семын кодшо ийын Юл кундем округышто изи предприятийлаште кокла пашадарын кушмыж дене Марий Элын икымше верыш лекмыжым аклаш лиеш. Лишыл жапыште Эспортлан полшышо рӱдер почылтшаш. Тудо верысе сатум йот эллашке колташ полшаш тӱналеш. А тӱжвал рынкыш темлышаш сату уло. Мутлан, Марий Эл шыл сатум шкалан кӱлеш деч 318 процентым ыштен луктеш, эн кӱкшӧ качестван шӧрым ямдыла, икмыняр Ай-Ти компаний сай лектыш дене пашам ышта. Форумышто тыгак Марий Эл деч сенатор Константин Косачёв лийын. Форум кышкарыште икмыняр соглашенийым пеҥгыдемдыме. Мутлан, Марий Эл правительстве ден «Российын Сбербанкше» коклаште внешнеэкономический пашам виктарыме шотышто ойпидышым ыштыме. Тыгак правительстве дене бизнеслан полшышо «Предпринимательствын фабрикыже» фонд коклаште кылым ыштыме.
