Республикым вуйлатыше калыкле проект почеш корным олмыктымо пашам аклен

Республикым вуйлатыше калыкле проект почеш корным олмыктымо пашам аклен
Теҥгече республикым вуйлатыше Александр Евстифеев Йошкар-Оласе да Медведево районысо корнылам ончен савырнен. Тӱҥ амалже- «Лӱдыкшыдымӧ да сай качестван автомобиль корно- влак» калыкле проект почеш оласе да республикысе корнылам олмыктымо пашам аклымаш. Эн ончыч тудо Сомбатхей микрорайонышто Ленин проспектым ончен. Олмыктымо кужыт кум меҥгат пелыш шуйна. 244 вынемым пужен ыштыме, шым тӱжем утла метр бордюр кӱым вашталтыме, асфальтын ӱмбал ужашыжым вашталтыме, тротуарым олмыктымо, автобус площадкылам тӧрлымӧ, газонышто рокым ешарыме да шудым ӱдымӧ. Подрядчик- влак пашам ончылгоч шуктеныт. Вара тергыше- влак Первомай уремым онченыт. Туштат олмыктымо корно кужыт кум меҥгыш шуын.  200 вынемым олмыктымо, куд тӱжем метр бордюрым вашталтыме. Тиде уремыште олмыктымо паша республикым вуйлатышым куандарен огыл. Сандене вуйын шогышо- влаклан ситыдымашым кораҥдаш кӱштен. Вара тергыше- влак Санчурск корныш миеныт. Тудо ятыр ий дене водитель- влаклан нелылыкым луктын. Ынде куанен коштыт. Тиде республике кӱкшытан корно. Тудын кужытшо 30 меҥге утла. Пашам кок ий ончыч тӱҥалме. Тачысе кечылан 9 меҥге утла кужытым пашаш колтымо. Кодшо 21 меҥгыжым 25-ше октябрь марте ыштен шукташ палемдыме. Александр Евстифеев палемден: ме чек марте кумло меҥгым эртышна. Замечаний уке, манаш лиеш. Корно тӱрым эше тӱзландараш кодеш. Тиде паша 20-шо сентябрь марте мучашлалтшаш. Тиддеч вара республикым вуйлатыше Карл Маркс уремыш миен. Тушто олмыктымо пашам пеш начар манын аклен да кугарня марте раш графикым ыштен пуаш кӱштен. Пашам шуйкалыде шукташ кӱлеш манын.

Прошлые выпуски