Юл сер оласе Йоча усталык пӧрт утыр уэмеш
Юл эҥерын кӱкшӧ серыштыже, Козьмодемьянск олаште, капитально олмыктымо деч вара йоча усталык пӧртын актовый залже ден методический кабинетше почылтыныт. Туныктымо пашан кӱлешан ужашыжым вияҥдыме пашалан республикым вуйлатыше кугу тӱткышым ойыра. Тунемме тӧнеж- влакым олмыктымаш республике мучко шукталтеш. Тыге йоча- влаклан тунемаш, усталыкыштым вияҥдаш йӧн утыр саемеш. Санденак ӱдыр-рвезе- влак тӱрлӧ конкурс ден фестивальлаште сеҥыше радамыш логалыт. Козьмодемьянскысе йоча усталык пӧртым 2009-ше ийыште аварийныйлан шотлымо ыле, кок ий гыч тудлан ончычсо типографийын пӧртшым пуэныт. Но коллектив олмыкташ шонымашым кудалтен огыл. Оксам погеныт, бюджет полшен, калыкат шийвундым пуэден. 2015-ше ийыште икмыняр пӧлемже омсажым почын, вара спортзалым олмыктымо. Теве кодшо кечылаште методпӧлем ден актовый залымат ыштен шуктымо. Ынде федерал проект почеш материально- технический базыжымат уэмдаш шонат, йоча- влаклан верат ешаралтшаш. Тыге Владимр Путинын 2024-ше ий марте 85 процент йочалан ешартыш шинчымашым пуаш тӱҥалаш шындыме задачыже шукталтеш.- ойла пӧртын директоржо. Тиде туныктымо тӧнеж республикыштына ешартыш шинчымашым пуышо кум эн сай муниципал учреждений радамыш пура.
