Таче Козьмодемьянск оласе тоштер ик курымаш лӱмгечыжым палемда
Таче Козьмодемьянск олаште Марий Эл правительствын ӧрдыжтӧ эртарыме заседанийже эртен. Тудым почшыла, республикым вуйлатыше Александр Евстифеев Президент Владимир Путинын Александр Григорьев лӱмеш художественно- исторический тоштерын 100 ияш лӱмгечыж лӱмеш колтымо саламлымашыже дене палдарен. Тиде чапле тоштер Марий Элысе историй тӱвыра да шӱм-чон поянлыкын жемчужиныже улеш. Тудын фондыштыжо лӱмлӧ руш сӱретче- влакын радынашт, кид-паша сымыктышын памятникше, шергакан архив документ- влак аралалтыт. Кугу верым тыште илыше калыкын этнографий коллекцийже налеш. Тоштерын кызытат вияҥмыже, уна- влакым погымыжо, самырык тукымым туныкташ полшымыжо, шочмо кундемын историйжым палаш кумылаҥдымыже моткоч куандара,- возымо саламлымашыште. Евстифеев ешарен: Президентын саламлымашыже- коллективын пашажым кӱкшын аклымаш. Шке саламлымашыжым тыгак Российын тӱвыра министрже Владимир Мединский колтен. Таче лӱмгече лӱмеш тоштерыште кок оҥай ончер почылтын. Тиде «20-шо курымысо графика- сӱрет галерей коллекцийын негызше» да «Николай Фешинын паша коллекцийже». Лӱмгече пайрем Яков Эшпай лӱмеш калык тӱвыра рӱдерыште Эрик Сапаев лӱмеш опера да балет театрын «Щелкунчик» балетше дене мучашлалтеш.
